ISINI ATE

ISINI ATE

I Kute Liket, neh delea uahni durén

Nguk ijangko temas iawén,

Penulis bukuni lagu utem bulet ituyuhni teretén

Gih ara pat, gih ara laén

Ari Ujung Dah malé ku Kutecané,

Langkahni kami malé bejamu,

Olokdih payah kami nérah owé,

Uyet-uyet we kami demu

Cube ipanang cube iéngon ku ujung-ralik,

Kadang ara idepet penan si lemak-lungi,

Ike gere ara kalang pukekelik,

Kuruk rancalanpeh mera ntuk nge lagu pungi

Seberu ari Sepang, nutu tepung malé nos lepat,

Tenahni dengan'e ari kota si begeral Bekasi,

Kasé ike nge ara buku si lebih tepat,

Buku mokotni kite tason kén isini peti

Géh kené jeme tue jehmen

Gere are gading si gere mucerah

Cerahni gading olok mutuah,

Ike kite simak manat putenah awan urum enen

Nti lagu piring si nge mucerah

Cerahni piring gere naéh mokot malé mupecah

Tuak kukur tuak

Kukur penggune ari Kendawi

Ike wasni bukuni aku salah cerak

Kupembaca kutiro maaf urum tabi

Tuak kukur tuak

Kukur ari Penomon bun kén pengaci

Ike isini bukuni rasa'e kurang bijak

Buh urum-urum kite tetahi

Tuak kukur tuak kukur

Kukur Gewat si naru uki

Ku Tuhan kite wajib Besyukur

Keta selawat kite kirimen ku Nabi